ઘટનાની જાણ થતાં મણિકંદનના પરિવાર અને ગ્રામજનો તેમના મૃતદેહને પોલીસ સ્ટેશન લઈ ગયા અને ન્યાયની માગણી સાથે વિરોધ પ્રદર્શન કર્યું

(એજન્સી)        પેરમ્બલુર, તા.૧૯
કાઈ કલાથુરમાં ખેતરમાં હાર્વેસ્ટર મશીન ઓપરેટર તરીકે કામ કરતા એક દલિતની અગાઉની દુશ્મનાવટને કારણે સાથી કર્મચારી દ્વારા હત્યા કરવામાં આવ્યા બાદ તણાવપૂર્ણ પરિસ્થિતિ સર્જાઈ હતી. એક હેડ કોન્સ્ટેબલ બંને વચ્ચે શાંતિમાં મધ્યસ્થી કરી રહ્યો હતો ત્યારે જ આ હત્યા થઈ હતી. મૃતકના સંબંધીઓ અને ગ્રામજનોએ પોલીસ સ્ટેશનની સામે મૃતદેહ સાથે વિરોધ પ્રદર્શન કર્યા બાદ, હેડ કોન્સ્ટેબલને સસ્પેન્ડ કરવામાં આવ્યો હતો જ્યારે આરોપીની ધરપકડ કરવામાં આવી હોવાનું સૂત્રોએ જણાવ્યું હતું. કાઈ કલાથુરના એમ મણિકંદન (૩૨), જે તે જ વિસ્તારમાં એસ અરૂણના ખેતરમાં મશીન ઓપરેટર તરીકે કામ કરતા હતા, તેનો સાથી હિન્દુ પી દેવેન્દ્રન (૩૦) સાથે અંગત બાબતોને લઈને ઝઘડો થયો હતો. મણિકંદન, જે એસસી સમુદાયના છે, તેના કહેવા પર કાઈ કલાથુર પોલીસ સ્ટેશન સાથે જોડાયેલા હેડ કોન્સ્ટેબલ શ્રીધર તેમની સાથે અરુણના ખેતરમાં ગયા જ્યાં દેવેન્દ્રન હાજર હતા. સૂત્રોએ જણાવ્યું કે, હેડ કોન્સ્ટેબલે અનૌપચારિક રીતે દેવેન્દ્રનના મણિકંદન સાથેના મતભેદોને દૂર કરવાનો પ્રયાસ કર્યો. વાટાઘાટો દરમિયાન નશામાં ધૂત દેવેન્દ્રને મણિકંદન પર જીવલેણ હુમલો કર્યો. આ ઘટનાની જાણ થતાં મણિકંદનના પરિવાર અને ગ્રામજનો તેમના મૃતદેહને પોલીસ સ્ટેશન લઈ ગયા અને ન્યાયની માંગણી સાથે વિરોધ પ્રદર્શન કર્યું. કેટલાક લોકોએ પોલીસ સ્ટેશન પર પથ્થરમારો કરતા વિરોધ વધુ તીવ્ર બન્યો. ત્યારબાદ, પોલીસ સ્ટેશનને તાળાબંધી કરી દેવામાં આવી અને પરિસ્થિતિને નિયંત્રિત કરવા માટે ૧૦૦થી વધુ કર્મચારીઓને તૈનાત કરવામાં આવ્યા. સૂત્રોએ ઉમેર્યું કે, જિલ્લા મહેસૂલ અધિકારી એમ. વાડીવેલ પ્રભુ, તિરૂચી રેન્જ ડીઆઈજી વરૂણ કુમાર અને પેરામ્બલુર એસપી આદર્શ પચેરાએ વિરોધીઓ સાથે શાંતિ મંત્રણા કરી. જોકે, વિરોધીઓએ નમવાનો ઇન્કાર કર્યો અને ચાર કલાકથી વધુ સમય સુધી તેમનો વિરોધ ચાલુ રાખ્યો, જેના કારણે આ વિસ્તારમાં ટ્રાફિક પ્રભાવિત થયો. પેરામ્બલુર એસપીએ મીડિયાને જણાવ્યું કે શ્રીધરને સસ્પેન્ડ કરવામાં આવ્યો છે. વધુમાં દેવેન્દ્રન વિરૂદ્ધ અનુસૂચિત જાતિ અને અનુસૂચિત જનજાતિ (અત્યાચાર નિવારણ) અધિનિયમ, ૧૯૮૯ સહિતનો કેસ નોંધવામાં આવ્યો છે અને તેની ધરપકડ કરવામાં આવી છે.