ટ્રાયલ દરમિયાન, ફરિયાદ પક્ષના ૨૦ સાક્ષીઓમાંથી ૧૦ સાક્ષીઓ ફરી ગયા અને મુખ્ય આરોપી લોગુનું મૃત્યુ થયું

ચેન્નઈ, તા.રપ 
૨૦૧૩માં દલિતની હત્યાના આરોપી ૧૧ સવર્ણ હિન્દુઓ અને એક મુસ્લિમ વ્યક્તિને નિર્દોષ જાહેર કરતા, કાંચીપુરમ સેશન્સ કોર્ટે તપાસકર્તા પોલીસ અધિકારીઓની ‘સુસ્ત અને બેદરકારીપૂર્વક’ તપાસ માટે ટીકા કરી જેના કારણે કેસ નબળો પડી ગયો હતો. ન્યાયાધીશે સંડોવાયેલા અધિકારીઓ સામે વિભાગીય કાર્યવાહીની ભલામણ કરી. ૯ જાન્યુઆરીના ચુકાદામાં, કોર્ટે પ્રશ્ન કર્યો હતો કે ગુના માટે કોઈ પ્રત્યક્ષદર્શી ન હોવા છતાં, પોલીસે ફોરેન્સિક વિભાગની સેવાઓનો ઉપયોગ કેમ ન કર્યો. ફરિયાદ પક્ષનો કેસ એ હતો કે ૧૯ ડિસેમ્બર, ૨૦૧૩ના રોજ, મુખ્ય આરોપી જી લોગુની આગેવાની હેઠળની એક ગેંગ દ્વારા સ્થાનિક પેટ્રોલ પંપ પર ચિટિયામ્બક્કમ ગામના દિનેશની હત્યા કરવામાં આવી હતી. પોલીસે જણાવ્યું હતું કે લોગુ, એક વન્નિયર વ્યક્તિ, દિનેશના સમર્થકો દ્વારા તેની હોટલ પર હુમલો કરવામાં આવતા ગુસ્સે હતો. લોગુના વફાદાર લોકોએ કથિત રીતે શાળાના કેટલાક દલિત વિદ્યાર્થીઓ પર હુમલો કર્યા બાદ આ ઘટના બની હતી. કાંચી તાલુકા પોલીસ સ્ટેશને ૧૩ લોકોને આરોપી તરીકે રજૂ કર્યા હતા અને તેમની સામે હત્યા અને કાવતરૂં ઘડવાનો તેમજ જીઝ્ર/જી્‌ અત્યાચાર નિવારણ અધિનિયમની જોગવાઈઓ હેઠળ કેસ દાખલ કર્યો હતો. ટ્રાયલ દરમિયાન, ફરિયાદ પક્ષના ૨૦ સાક્ષીઓમાંથી ૧૦ સાક્ષીઓ ફરી ગયા હતા અને મુખ્ય આરોપી લોગુનું મૃત્યુ થયું હતું. પોલીસે કોર્ટને જણાવ્યું હતું કે તેમને ગુનાના સ્થળેથી લોહીથી ખરડાયેલી રેતી અને એક કન્ટેનર મળી આવ્યું હતું. હત્યા માટે કથિત રીતે વપરાયેલ હથિયાર થોડા દિવસો પછી મળી આવ્યું હતું. જો કે, ન્યાયાધીશે તપાસમાં ઘણી મૂળભૂત ભૂલો નોંધી હતી. ઉદાહરણ તરીકે, કોર્ટમાં FIR મોકલવામાં ૧૦ કલાકનો વિલંબ થયો હતો. જાતિગત દુશ્મનાવટ અને પૂર્વ દુશ્મનાવટ સહિત કથિત હેતુઓને સાબિત કરવા માટે કોઈ દસ્તાવેજ દાખલ કરવામાં આવ્યો ન હતો. ન્યાયાધીશે એ પણ નિર્દેશ કર્યો હતો કે પોલીસે લોહીથી ખરડાયેલા હથિયારો ફોરેન્સિક વિભાગને પણ મોકલ્યા ન હતા. પોલીસ અન્ય આરોપીઓની સંડોવણી સાબિત કરવામાં પણ અસમર્થ રહી. ન્યાયાધીશે કહ્યું કે આરોપીના કથિત કબૂલાતના નિવેદન સાથે કોઈ સંબંધ ન હોય તેવા હથિયારો અને વાહનોની માત્ર રિકવરી કેસ સાબિત કરવા માટે પૂરતી નથી.